مصطلحات كتير موجودة في الكتاب بنستخدمها وإحنا مش عارفين إيه معناها، وساعات بنكون عارفين معناها لكن بنطبقها في ظروف تانية مختلفة فالمصطلح معناه بيتغير.

خادم طلع على المنبر قدم كلمة ربنا بصورة كتابية -أو بصورة نالت استحسان البشر- ولما نزل كل الناس كانت بتتكلم عليه وتقول “الخادم ده ممسوح جدًا”، وخادم تاني مكنش موفق، فكان رأي الناس فيه “الخادم ده مش ممسوح”.

هل فعلًا فيه شخص ممسوح وأخر لا؟ ويعني إيه أصلا ممسوح؟

المسحة في العهد القديم

في زمن العهد القديم كان الرعاة مشهورين بأمر بيقوموا بيه لحماية المعيز والخرفان، كان في أثناء رعيهم فيه حشرات بتمسك في الصوف بتاعهم، كانت بتسبب ليهم ألم فظيع، وكانت بتدخل في ودانهم وده كان ممكن يخليهم يموتوا. الرعاة الشاطرين كانوا يجيبوا زيت ويسكبوه على راس الغنم ويمسحوا بيه كل جسمهم، وده كان بيحميهم من إن الحشرات تلصق فيهم. بشكل ما الزيت ده، مسحة الزيت دي كانت بتحميهم وتباركهم.

وفي العهد القديم كنا بنشوف نفس الشيء، المسح لأجل البركة في دور أو وظيفة معينة. فمثلا في خروج 29 في تكريس الكهنة يقول الوحي المقدس “وَتَأْخُذُ دُهْنَ الْمَسْحَةِ وَتَسْكُبُهُ عَلَى رَأْسِهِ وَتَمْسَحُهُ.”

وبنشوف في 1صموئيل 10 إن صمويل بياخد قنينة الدهن ويصبها على راس شاول ويمسحه ملك. وفي أصحاح 16 بعد تغيير الأحداث، نلاقي الرب بيقول لصمويل متزعلش عشان شاول مش مستقيم، أملأ قرنك دهنًا وامسح لي ملك أخر، مين هو داود!

المسحة في العهد الجديد

في العهد الجديد منلاقيش ولا مرة المسحة بتم بالشكل ده، يمكن نلاقي شيء مماثل -بس متقالش عليه مسحة- وهو الموجود في أصحاح 5 من رسالة يعقوب “أَمَرِيضٌ أَحَدٌ بَيْنَكُمْ؟ فَلْيَدْعُ شُيُوخَ الْكَنِيسَةِ فَيُصَلُّوا عَلَيْهِ وَيَدْهَنُوهُ بِزَيْتٍ بِاسْمِ الرَّبِّ”.

أمال يجي فين الكلام عن المسحة في العهد الجديد؟

يجي طبعًا عن الرب يسوع، مسيح الرب، وده في شيء يخصه هو ومهمته إللي حققها لوحده بدون أي اشتراك مننا. فيقول مثلا بطرس في أعمال 10 “يَسُوعُ الَّذِي مِنَ النَّاصِرَةِ كَيْفَ مَسَحَهُ اللهُ بِالرُّوحِ الْقُدُسِ وَالْقُوَّةِ”.

ويجي كمان عننا إحنا المؤمنين -وده مهم جدًا لأن في الأغلب ده الجزء إللي عليه اللغط- يقول الروح القدس في كورنثوس التانية 1 “وَلَكِنَّ الَّذِي يُثَبِّتُنَا مَعَكُمْ فِي الْمَسِيحِ، وَقَدْ مَسَحَنَا، هُوَ اللهُ الَّذِي خَتَمَنَا أَيْضاً، وَأَعْطَى عَرْبُونَ الرُّوحِ فِي قُلُوبِنَا”. بيكلم كل المؤمنين، إللي عندهم مشاكل كتير في حياتهم، إن كلهم الله مسحهم وأعطاهم عربون الروح القدس.

وفي يوحنا التانية 2 وهو بيتكلم عن المعلمين الكذبة إللي معندهمش الروح القدس يرشدهم للتعليم الصحيح، يقول عن الكنيسة “ وَأَمَّا أَنْتُمْ فَلَكُمْ مَسْحَةٌ مِنَ الْقُدُّوسِ.. وَأَمَّا أَنْتُمْ فَالْمَسْحَةُ الَّتِي أَخَذْتُمُوهَا مِنْهُ ثَابِتَةٌ فِيكُمْ”.

مفيش مؤمن في العهد الجديد ممسوح ومؤمن تاني لا! في الحقيقة لما بتقول على شخص إنه مش ممسوح فده معناه إنه مش مؤمن من الأساس.

ربما يكون قصدك إنه مش مدعو للخدمة دي، أو مش جاهز أو مؤهل ليها، وحتى لو ده قصدك فاتمهل وإنت بتحكم وبتقول كده. لكن حتى لو كلامك ده صحيح، فكلاشيه “الخادم ده مش ممسوح” هو ترديد غلط وفهم مش صحيح لإعلان الروح القدس لينا عن يعني إيه “مسحة” في الكنيسة جسد المسيح.

شارك مع أصدقائك