الاشتراكية، إيه هي الاشتراكية؟ في أبسط تعريف لها الاشتراكية هي النظام الاقتصادي إللي بيقتضي إلغاء الملكية الفردية. فملكية الفرد، هي ملكية الجماعة.
عذرًا لأساتذة الاقتصاد لو كان التعريف بسيط جدًا، لكننا مش هدفنا في حلقتنا النهاردة نتكلم عن الاشتراكية، لكن عن الكلاشيه المعروف إن الكتاب المقدس بيشجع على حياة الاشتراكية!
طيب الناس إللي بتدعم الفكر ده بيحاولوا يقولوا إيه وبيستندوا على إيه في الكتاب المقدس؟
بيستندوا على النص المشهور في أعمال الرسل 2 “وَجَمِيعُ الَّذِينَ آمَنُوا كَانُوا مَعًا، وَكَانَ عِنْدَهُمْ كُلُّ شَيْءٍ مُشْتَرَكًا. وَالأَمْلاَكُ وَالْمُقْتَنَيَاتُ كَانُوا يَبِيعُونَهَا وَيَقْسِمُونَهَا بَيْنَ الْجَمِيعِ، كَمَا يَكُونُ لِكُلِّ وَاحِدٍ احْتِيَاجٌ”
وده بيخلي بعض الناس بتطالب إن كل المؤمنين في الكنيسة يكونوا عايشين في نفس المستوى المعيشي، نفس اللبس بنفس الأكل نفس مستوى البيت ونفس نوع العربية. لدرجة إن بعض الأحباء عملوا مجموعات فعليًا بيمارسوا فيها ده فكل شخص بيشتغل أي عمل يجيب إللي بيقبضه ويعيدوا توزيع الفلوس بحيث الكل يقبض نفس الفلوس بالظبط!
هل ده كان المقصود من النص في أعمال 2؟
أعمال الرسل هو سفر انتقالي، بيسرد لينا فترة خاصة جدًا في حياة الكنيسة، وهي فترة تأسيسها. في الوقت ده المؤمنين كانوا منتظرين مجيء الرب بشكل وقتي أو سريع، فكل شخص بدأ يقدم ممتلكاته تكون مشتركة مع جميع المؤمنين.
خلي بالك، أنا مش بقول مكنش بيعمل ده بحب، طبعًا بيعمل ده بقلب وبحب، لكن سفر الأعمال مش بيسرد لينا الحادثة دي عشان يقولنا لازم نعيش ده النهاردة وعكس كده يبقى خطية.
طيب نعرف الكلام ده منين؟ نشوف تعليم الرسل في الرسايل. هل الروح القدس علمنا في تعليم واضح في رسايل العهد الجديد إننا نبيع كل ما نملكه ونتقاسمه مع المؤمنين؟
مثلا في رسالة تسالونيكي الثانية بولس بيقول للناس إللي قالت الرب جاي خلاص وبلاش نشتغل والكنيسة تعولنا بيقول “أَنَّهُ إِنْ كَانَ أَحَدٌ لاَ يُرِيدُ أَنْ يَشْتَغِلَ فَلاَ يَأْكُلْ أَيْضًا“.
وبيعلم بقية المؤمنين في نصوص كتير إن العطاء بيكون شيء اختياري، وبيقول كده عن العطاء في رسايله أنه “ما تيسر”، إنه حسب الطاقة“.
ده مش عكس إن ربنا عايزنا نهتم بإخواتنا المحتاجين، اقرا مثلا يعقوب 2. ده مش معناه نغلق احشاءنا ومنساعدش إخواتنا في الجسد. لكن ده بيقول لنا إن رسالة العهد الجديد مش بتلزمنا إننا نعيش كلنا في نفس المستوى المادي. بالعكس رسالة الإنجيل بتتجلى مش لما الكل يكونوا نفس المستوى، لكن لما نكون واحد ونعيش بمحبة حتى لو فيه اختلاف ظاهر.